Home / 影視 / 馬德鐘 Ali 首登視帝視后寶座 蕭正楠黃翠如已婚!一文睇哂萬千星輝頒獎典禮 2018

馬德鐘 Ali 首登視帝視后寶座 蕭正楠黃翠如已婚!一文睇哂萬千星輝頒獎典禮 2018

年尾流流就梗係頒獎禮一蘿蘿,噚晚( 12 月 17 日)TVB 就派發咗佢哋嘅年度成績表,表揚過去一年表現突出嘅 TVB 藝人。如果無睇到嘅就等細佬同大家睇一次成個頒獎禮,如果已經睇咗嘅就等細佬同大家重溫返啲亮點啦!

萬千光輝演藝人大獎——薛家燕

家燕姐今年入行 60 年,不論係《真情》嘅好姨,定《皆大歡喜》嘅慈姑都非常入屋,十字步亦都深入民心,今年仲為咗演唱會好玩得咁抽 Marvel 水,自抽額頭粒痣係第 7 粒寶石,《 Captain Nancy 》可以話 hit 足成個下半年!

飛躍進步男藝員——何廣沛

何廣沛今年雖然得兩套劇擔正,但兩套劇都好有發揮空間,包括喺《天命》做極度正直、大貪官和坤個仔豐紳殷德,同《跳躍生命線》嘅卓家傑,雖然因為卓家傑一角曾經被封為新一代衝動派 KOL ,但隨住劇情推進卓家傑要變得沉穩,何廣沛都處理得好好,抵佢攞獎!

飛躍進步女藝員——馮盈盈

呢個真係可以話爆大冷,爆到馮盈盈自己都話:「唔好意思,我一直都以為自己唔會拎呢個獎,我無諗過講咩,仲諗住頒完出洗手間。」事前大熱、極少負面嘅張曦雯居然攞唔到獎!但其實馮盈盈自 2016 年當選港姐冠軍之後,一直都被封為最貼地港姐,因為佢嘅言論永遠都冇一般港姐嘅架子,今年喺《後生仔傾下偈》不時爆出金句,面對踩界內容亦都可以輕鬆應付。另外,佢喺《果欄中的江湖大嫂》飾演小狼女都有俾人讚第一次拍劇算係做得幾好。雖然爆冷得獎,不過馮盈盈依然好謙虛表示自知未夠料,嚟緊要更加努力證明俾大家睇自己係配攞呢個獎。

最佳女配角——林淑敏《愛・回家之開心速遞》

林淑敏嘅演藝事業並唔係一帆風順, 2000 年參選港姐而入行,但入行 10 年一直都只係做啲完全唔起眼嘅配角,更加喺 2010 年不幸患上乳癌。抗癌成功之後好似脫胎換骨一樣,2013 年喺《幸福摩天輪》飾演愛女心切嘅靚媽,同《 On Call 36 小時 II 》飾演自私媽媽虹虹,兩個性格南轅北轍嘅角色都完美呈現,因而備受關注。上年林淑敏已經因為喺《愛・回家之開心速遞》演野蠻潑辣嘅大小姐演得入形入格而獲得最佳女配角嘅提名,可惜大熱倒灶、未能獲獎。不過林淑敏的確將大小姐一角演得出神入化,今年終於攞到獎喇!

最受歡迎電視歌曲—— Hana 菊梓喬《但願人長久》

Hana 自加入星夢一直都好努力,短短兩年就出咗 18 首歌,雖然當中唔少都係電視劇嘅主題曲、插曲同片尾曲,但唱功一向紮實嘅 Hana 的確為唔少劇集昇華,加強觀眾對劇集嘅投入。上年嘅《使徒行者 2 》片尾曲《忘記我自己》嘅點擊率喺今年 11 月已經累計達 1000 萬,如果只係靠公司硬棒、冇實力嘅話冇乜可能有呢個成績。

專業演員大獎——盧宛茵、鄭子誠、區瑞偉

盧宛茵 Madam Lo 唔怕定型,一入行第一套劇就已經做人阿媽,咁多年嚟無論係慈母、億萬貴婦定刻薄奶奶都演得有血有肉,今年喺《 BB 來了》亦都完美呈現永遠無人會解決到嘅婆媳糾紛。

講起鄭子誠就一定係有陰謀,因為咁多年嚟都係做奸角為主,不過咁並唔代表佢剩係識做奸角,今年《跳躍生命線》做正氣到不得了嘅教官就係好例子!

區瑞偉入行咁多年,不論正派定反派、正經定搞笑、時裝定古裝,乜類型角色都演過,近年有份參演嘅《城寨英雄》、《同盟》、《愛・回家之開心速遞》等等都有唔錯嘅收視。

最受歡迎電視拍檔——蕭正楠、曹永廉

呢一個獎完全俾蕭正楠騎劫咗,因為佢講咗句:「我要多謝我太太黃翠如。」自爆同黃翠如已經結咗婚,全場藝人 O 哂咀(雖然唔少網民話係刻意安排,但細佬相信大部分 artist 真係唔知),成功搶哂全場焦點,最正係馬明個口形係問蕭正楠「真係結咗婚呀」!嘩,原來呢個世界真係有人嘅保密工夫做得好過 Marvel ww!

最佳非戲劇節目——《嫁到這世界邊端 2 》、《美女廚房》、《森美旅行團》、《後生仔傾下偈》、《周遊東京》

最佳節目主持——田蕊妮《女人四十》

最佳男配角——梁烈唯《是咁的,法官閣下》

噚晚嘅第二個大冷門,雖然呢個獎今年冇人係大熱,但相信冇乜人諗過會係梁烈唯,連佢自己都冇諗過:「早知有得攞獎就搵人幫我化妝同梳頭。」入行 14 年事業好似冇乜起色,早幾年仲要負面新聞不斷,佢自己都諗過想放棄,唔知呢個獎會唔會令佢重拾信心,演技繼續進步呢?

最受歡迎電視男角色——任三恕(馬國明飾)《宮心計 2 深宮計》

馬明第三次攞男角色喇,但再一次失落視帝⋯⋯今次冇再「唔 × 係掛」天然呆,仲要串爆全晚 Tempo 嘅植入式廣告:「唔使俾紙巾我,我唔係代言人,我冇收到錢」仲要話唔知自己點解攞獎,再抽蕭正楠水話自己未註冊。 TVB 不如下年真係頒個視帝俾人啦⋯⋯

最佳男主角——馬德鐘《跳躍生命線》

原來馬神入行 25 年、之前 15 次提名視帝,但一次都未攞過!細佬真係由細睇馬神睇到大,無論係《西遊記》、《衝上雲霄》定係《情迷黑森林》,套套都有好深刻嘅印象。喺 2011 年北上發展之後,間中都會返 TVB 拍劇,其中 2015 年嘅《以和為貴》口碑唔錯,可惜都係同視帝擦身而過,今年終於憑《跳躍生命線》勇奪視帝。

最受歡迎電視女角色——太平公主(陳煒飾)《宮心計 2 深宮計》

賽前視后大熱、俾狗仔隊影哂相特登造衫嘅煒哥雖然失落視后,但都起碼攞返個女角色。煒哥喺 2008 年結婚之後就息影,直至 2012 年復出加入 TVB ,佢嘅演技並冇因為息影而退步,仲要呢 6 年嚟幾乎乜嘢類型嘅角色都做過,全部都 carry 得好好,但喺香港就係同獎項無緣,今年終於喺香港攞到獎喇!

最佳女主角——李佳芯《 BB 來了》

噚晚嘅第三個冷門,相信唔少人都會以為視后唔係黃智雯就係陳煒,但坦白講 Ali 真係做得唔差,一路走嚟都唔容易、都係敬業樂業,不論係未入電視圈、仲做緊 model 嘅時候,已經被大讚唔會恃住自己靚女而麻麻煩煩。到 2008 年加入有線做體育主持,其後轉為娛樂主持,一直都好畀心機,可惜因為有線係收費電視, Ali 始終都係唔夠入屋。到 2012 年決定加入無線重新出發,捱咗 4 年終於喺《潮流教主》同《律政強人》擔任第二女主角,演技開始受到肯定,更加喺上年憑《踩過界》奪得新加坡視后。今年攞到視后, Ali 都可以話係搵命搏,佢之前喺一個訪問講過因為《 BB 來了》係緊接《跨世代》拍攝,中間嗰一個月空檔佢去做咗個婦科手術,本來想辭演但唔成功,唯有冒住子宮下垂嘅風險去拍。所以呢個獎 Ali 真係用血汗換返嚟。

最佳劇集——《跳躍生命線》

《跳躍生命線》真係實至名歸,演員之間嘅張力、劇情嘅推進、配樂嘅運用、以致每集結尾 VO 嘅運用都係恰到好處,冇貪心想講好多嘢,亦冇刻意製造金句,更加冇為感情線忘記套劇嘅本質係講救護,而且結尾嘅做法喺香港真係好少見!希望美好嘅嘢就停留喺呢點,千祈唔好拍續集……

海外獎項
最喜愛劇集(新加坡及馬來西亞)——《三個女人一個「因」》

雖然黃智雯同袁偉豪喺香港冇獎攞(細佬私心覺得好可惜,因為稍為有接觸過戲劇都知,一人分飾兩角已經好難,黃智雯仲要一人分飾三個人格,可以話係演技大躍進,點解會冇獎攞㗎⋯⋯),不過就威盡星馬,先前已經成為咗新加坡同馬來西亞嘅雙料視后、視帝,噚晚仲攞埋星馬最喜愛劇集,完全深得星馬 fans 歡心。

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

1 部相機 + 14 日 = 一套賀歲片!純香港製作《恭喜八婆》值得入場支持!

雖則話今時今日剩係用部 iPhone 都已經拍到 4K 60fps、1080p 240fps,甚至奧斯卡金像獎最佳導演Steven Soderbergh 挑戰過剩係用 iPhone 拍咗一套擺上大銀幕嘅《 UNSANE 》,不過有 budget 嘅邊個拍戲嘅唔想租返部大機吖,畫質好啲吖嘛。奈何 10 個搞藝術 9 個窮,演員又係錢、場租又係錢、前期後製都係錢,拍膊頭都拍唔到咁多範啦(人哋唔使開飯咩),budget 有限咁點算,彭浩翔導演選擇棄專業攝影機,用一部 Panasonic GH5 去完成整套戲嘅拍攝工作!