Home / 吃喝玩樂 / 京都警方新方法追罰款 唔找數就充公動漫珍藏品 😈

京都警方新方法追罰款 唔找數就充公動漫珍藏品 😈

雖然我哋成日都話日本人好禮貌、好守規矩,但其實只係隔離飯香啲啫,每個地方點都會有人唔守規矩,其中喺京都違例泊車欠交罰款就令到當地警方幾頭痕,舊年欠交嘅違泊罰款已經累積到 ¥9,100 萬日圓(約港幣 $634 萬),你都咪話唔多錢。

以往對付呢啲走數嘅人,通常都係直接喺佢哋人工度扣,或者就沒收當事人好似車咁嘅貴價財產,再唔交罰款就賣咗佢。不過似乎咁樣都嚇唔到一班無乜貴價嘢嘅走數人。

今年開始,京都警方就諗到條新橋對付呢班人,就係將可以被扣留嘅財物擴展到漫畫、 figure 、遊戲機等睇落唔貴,但有班好此道嘅人會肯畀錢買嘅嘢。截至 10 月 12 號已經有 101 件被沒收物品擺咗上拍賣網,收返近 10 萬日圓,同時喺呢個政策底下,好多人為咗保住自己啲「老婆」,都嗱嗱聲喺啲「老婆」俾人擺上網之前交還罰款,京都警方足足追返 300 萬日圓。

好誇張?咁我講多個實例俾你知,有位女士喺近 3 年來足足收咗 19 次繳交罰款嘅命令,但佢就一於懶理,總共拖欠 3 萬 8 千 2 百日元罰款, 10 月 19 號京都警方終於採取沒收佢財物嘅方法。但神奇嘅事就發生喇,當佢被通知部遊戲機將會畀人沒收嗰陣,佢即刻吹雞問人借錢,即刻找清條數!

Source:Yomiuri Online

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

Hot Toys Rebel Base 登陸海港城 一齊走入千歲鷹揀Figure

Hot Toys 喺香港又有新 …