Home / 影視 / 反璞歸真 少無謂嘅打鬥反而更好睇 《大黃蜂》觀後感

反璞歸真 少無謂嘅打鬥反而更好睇 《大黃蜂》觀後感

遲就係遲咗少少,不過真係忙吖嘛,唔係屋企停水索性一早起身去睇早場嘅話,差啲就 miss 咗一套好戲!坦白講,未出 trailer 之前其實對《大黃蜂》無乜期望,因為《變形金剛》呢個 title 已經好似俾人玩難咗咁,第一集係好睇嘅,啲機械人打鬥係令人眼前一亮嘅,Megan Fox 係正嘅,不過去到第二集已經覺得有少少只係賣弄緊啲 CG,去到第三集換咗女主角,啲刻意 show 性感多到我差啲唔得自己係睇緊《變形金剛》,之後兩集就更加唔好提……

《變形金剛》劇照

不過當 trailer 出咗之後細佬就有啲期待,女主角年僅 22 歲嘅 Hailee Steinfeld,配埋大黃蜂一貫可愛嘅形象,第一眼俾到人一種青澀嘅味道。加上明明係打跛腳唔使憂嘅 Nike 接班人、都係要辛苦自己做導演嘅 Travis Knight,刻意將呢套故事設定喺 1987 年嘅外傳拍返有 80 年代嘅風格,有一種反璞歸真嘅感覺。

《大黃蜂》其實好跟一條標準嘅方程式,主角融入唔到周圍、俾人恰,然後同一個唔係人嘅角色成為咗好朋友,跟住就會發生啲事要互相保護、互相拯救,最後就為咗對方好而被迫分開。雖然劇情再冇由頭打到落尾(嚴格嚟講就係得頭同尾係打鬥場面),好似玩緊條好老套嘅橋,但正正因為咁做,先至更加突顯博派機械人人性嘅一面,大黃蜂為咗保護女主俾人打都唔還拖就係最好嘅例子。又或者可能係以大黃蜂為主軸,無咗柯柏文、鐵皮嗰種硬橋硬馬嘅感覺,喺處理呢啲劇情上毫無違和感(即係如果柯柏文俾打唔還拖你會覺得佢廢,但套落大黃蜂度你會覺得佢慘)。

另外,故事裡面女主角只係啱啱 18 歲,行為唔夠成熟非常合理,正正因為呢個原因,因為大黃蜂嘅好奇而做出滑稽嘅行為、以及同女主角嘅互動比起以往五集嚟得更合理、更人性化。仲有一點,近年唔少荷里活電影都好政治正確咁 sell 女權,但處理得唔好真係會令人覺得為 sell 而 sell,不過《大黃蜂》就無呢個問題,雖然套戲係女性主導,但無刻意抬高女性嘅感覺,一切都嚟得好自然,可能呢個先至真係推崇平等而應該拍到出嚟嘅感覺。

作為斷定《變形金剛》係生係死嘅作品,絕對拯救返整個系列,不過與其因為呢套嘅成功而繼續暫停咗嘅計劃,不如借住呢個外傳嚟 soft reboot,重新講一個更人性化嘅《變形金剛》,好過又變返做一套除咗打就係打嘅電影吖!

題外話,不如講下 Hailee Steinfeld,雖然佢年紀輕輕,但其實演技一早備受肯定,佢喺 14 歲嗰陣已經憑《True Grit》入圍第 83 屆奧斯卡金像獎,獲得最佳女配角嘅提名,近年有份參演《 Pitch Perfect 2 》同《 Pitch Perfect 3 》都令人有深刻印象。Hailee 唔止有演技,仲要有唱功,佢喺《 Pitch Perfect 2 》唱嘅《 Flashlight 》唔單止喺網絡上瘋傳,更為佢帶嚟唱片公司 Republic Records 嘅合約,處女專輯《 Love Myself 》喺多個國家達到白金銷量,前年同 DJ Zedd 以及 Grey 合作嘅《Starving》更加喺美國 Billboard 100 排行 12!除咗演得、唱得,仲要跳得,而家先 22 歲,真係大把前途。

《 True Gift 》劇照

 

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

Captain Marvel 令 Blockbuster 變朝聖熱點 ?

在電影 Captain Mar …