Home / 樂活態度 / 出遊行樂 / 影藝再次重生!?九龍城廣場現影藝戲院圍板!

影藝再次重生!?九龍城廣場現影藝戲院圍板!

影藝戲院嘅歷史大家未必知,但相信大家對影藝呢個名絕對唔會陌生,因為佢可以話係近年戲院界逆流嘅一分子,當啲大片喺大部分戲院講緊張飛正價肯定過百嘅時候,佢賣緊六七十蚊,當然張櫈係無咁好坐,咩全景聲、 4K 更加唔使諗,但的確為大家帶嚟一個平價入場睇戲嘅選擇,不過喺今年 3 月 28 日淘大商場嘅影藝就約滿就結業。

淘大商場影藝(來源: WikiMedia)

不過最近有讀者發現九龍城廣場一樓有半層已經圍咗圍板,寫住「 CINEART 影藝戲院 COMING SOON 」,呢個位置正正係九龍城廣場翻新前戲院嘅位置,而家先圍圍板,相信最快都下年年中先會開業。

相片由讀者 Leon Lee 提供

影藝戲院首次係 1988 年 7 月喺灣仔開業,由中資銀都機構開辦,主打中國、日本、歐洲嘅非主流藝術電影,歷年最賣座係 1990 年 12 月獨家上映嘅日本電影《搶錢家族》,直至 1992 年 5 月先落畫。其他如《情書》、《世紀末暑假》,同電影節首次上《天空之城》,都係令電影迷津津樂道嘅作品。

主打得非主流,喺香港最終都係得一個下場,喺 2006 年 11 月 30 日,因為戲院蝕錢蝕得太勁而結業。直至 2009 年 4 月滿血復活,接手淘大百老匯再次開業,轉為主打平價路線,無論係大片定細片票價都比同區嘅 MCL 以及 2014 年先開業、同樣行平價路線嘅星影匯都要平。直到今年 3 月 28 日再次結業,不過今次就唔係賺唔到錢,只係約滿淘大將個位租咗比 UA 。

影藝戲院灣仔舊貌(來源:Wikipedia )
影藝戲院灣仔舊貌(來源:Wikipedia )

而新址前身嘅九龍城戲院係喺 1993 年 12 月開業,初期係由九龍城街坊會營運,直至 1996 年 2 月由 UA 接手管理。不過自 1998 年啟德機場搬咗之後,九龍城嘅人流大不如前,終於喺 2005 年結業,街坊會再度接手,不過始終冇辦法提升人流,最終喺九龍城廣場 2006 年翻新時結業。其實近年附近有多個住宅項目落成之後,九龍城嘅人流已經多返,事隔 13 年終於再有戲院落成,對九龍城附近嘅街坊嚟講絕對係好事。

九龍城戲院舊貌(來源:Gwulo: Old Hong Kong)

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

Captain Marvel 令 Blockbuster 變朝聖熱點 ?

在電影 Captain Mar …