Home / Playit專題 / 打到嚟澳門:Live Spectacle NARUTO-火影忍者-

打到嚟澳門:Live Spectacle NARUTO-火影忍者-

IMG_0033

NARUTO﹣狐忍(火影忍者)嘅漫畫雖然“終於”完結咗,不過咁有人氣嘅作品又點會話完就完,除咗續編漫畫火速接棒之外,仲有個舞台劇繼續搵銀,緊接住日本嘅巡迴演出,WORLD TOUR嘅第一站撞啱佛誕長假期喺澳門威尼斯人公演, 雖然筆者唔算係NARUTO嘅FANS,但由舞台劇版公開造型開始,佢尤如餅印嘅造型都已經令人乖乖畀錢入場。

photo02

 

今次真人版舞台劇《Live Spectacle NARUTO-火影忍者-》,故事係以漫畫第1至27期單行本的第一部改編而成,當然要將咁多劇情濃縮到兩個零鐘嘅舞台劇實在要狠狠咁CUT走好多嘢,例如整個中忍考試都已經唔存在喇,三代火影同大蛇丸之戰變為單打獨鬥草草了事,不過主要嘅骨幹尚且保留到應有嘅起承轉合,由鳴人嘅啟蒙、修行,到第一次任務反思忍者的意義,再到木葉村受襲、拯救同為尾獸嘅我愛羅,最後大家追返走咗去嘅佐助,鳴人同佐助喺終末之谷作最後對決。

當然舞台劇版最得意嘅地方係“如何呈現各種忍術”,除咗多得而家投影技術嘅配合之外,場上又有啲機關同彈床,不過筆者都不得不讚劇組嘅心思,因為有幾個場口都係好有驚喜嘅。

 

驚喜1:NEON DANCE影分身

開場講到鳴人第一次使出影分身,跟住燈光一黑,就有幾個橙色NEON鳴人出嚟,效果一流又夠TREND。

photo01

驚喜2:我愛羅“沙畫”回憶

有一場講到我愛羅身世點慘法,舞台投影由一幅幅沙畫組成嘅回憶錄,勁有FEEL之餘真係夾用沙嘅我愛羅。

IMG_0077

驚喜3:九尾舞北獅

其實九尾出現嘅效果多數都係投影就搞掂,不過鳴人第一次出現九尾化就用咗道具一個人舞獅頭,幾個人舞獅尾(真係舞足九條㗎),唯一問題係細隻咗少少囉。

 

驚喜4:丁次波波倍化術

講到NARUTO AND FRIENDS去追佐助時,其實配角們先至一人表演一招咁大把,丁次嘅倍化術就真係整咗個吹氣大波波出嚟,仲掟咗落台同台下觀眾互動吓,好笑得嚟真係有得睇有得玩。(當然只限買最貴飛嗰班啦…)

photo04

 

至於套劇好唔好睇?其實唔使講咁多,入得場基本都係FANS,淨係OPENING每個人物出一出場啲觀眾已經勁HIGH啦,之後睇到唔同嘅忍術又會尖叫,完場時一眾演員仲走哂落台同人握手,同用廣東話謝幕(雖然講得唔係好正,但係講廣東話),點都算值得一睇啦。

photo03

同SAKURA握到手~LUCKY~~

 

PS:睇之前有朋友問:講日文咪睇唔明囉?我都忍唔住答:乜狐忍個故仔你仲會唔知佢講乜嘅咩?當然除咗大家對個故仔熟到爛之外,其實佢左右兩邊都有個熒幕出埋中英字幕,而且人名都係“鳴門(鳴人)”、“鹿驚(卡卡西)”咁樣出, 唔怕有唔同地區出現嘅譯名嘅問題啦。

goods1

world tour得好少嘢賣….

IMG_0032

場刊跟埋中英文譯本,算係幾有心,美中不足係冇咗最後專訪嗰PART…

Comments

comments

About 薛高

薛高

Check Also

【 DIY 耳機】靚聲耳機動手做:單動圈篇

為了追求靚聲,大家會花多少錢來購買耳機?市場上被稱為好聲的耳機動輒都兩三千,但你有沒有想過原來耳機都可以 DIY ?由這個星期開始, Jonathan 會一連三星期,帶大家進入 DIY 耳機的殿堂,由動圈講到動鐵。第一篇就先來介紹自製單動圈耳機!