Home / 潮流玩物 / 推銀機都有得自製 童年回憶返哂嚟!

推銀機都有得自製 童年回憶返哂嚟!

今時今日推銀機喺香港機舖真係買少見少,想當年推銀機係好受歡迎,同時亦都全場最搵錢嘅一款機,因為成日都好多銀好似就跌就跌咁,引到唔少人不斷入銀,但其實啲銀根本就疊得好實,唔係咁易跌!

雖然早幾年係出過啲百幾二百蚊嘅 mini 推銀機,而家都仲有地方有賣,不過玩推銀機就係想賺人哋啲代幣,畀錢買嚿嘢返嚟自己賺自己錢實在有啲笨,但如果部推銀機係自己砌又唔同講法!

講緊嘅就係日本一本以 3-6 歲幼童為對象嘅益智月刊《幼稚園》,佢哋上星期四 12 月 27 日出版嘅 2019 年 2 月號(係呀,日本啲雜誌嘅期數都係跑前一至兩期㗎)同 SEGA 合作,附送一部模仿 SEGA 出品嘅推銀機「巴比倫的金幣塔」嘅紙製推銀機,而且呢部機係要自己砌,附送咗 50 個膠幣,玩嗰陣係要入一粒 AAA 電。喂!呢本認真係小朋友雜誌嚟,小朋友自己邊識砌呀 😂?

小學館出版嘅《幼稚園》2 月號
紙紮 SEGA 巴比倫的金幣塔推銀機
喺機側邊入銀

今次唔係《幼稚園》第一次同其他品牌合作出啲複雜些少嘅附錄,上年 9 月,佢哋就同著名嘅迴轉壽司舖「無添藏壽司(無添くら寿司)」合作,送過真係識轉嘅紙紮迴轉壽司盤;而 10 月就同 Bandai 合作送過真係扭到蛋嘅紙紮扭蛋機。其實出啲咁複雜嘅附錄都係志在製造多啲親子時間畀大家。呢本雜誌喺香港嘅日本書店同 Sogo 之類日本百貨公司圖書部都會買到,船運版一兩個星期內就會返書,有興趣嘅話不妨去買本返嚟同囝囝囡囡過年砌下。

同「無添藏壽司」合作嘅紙紮迴轉壽司機
同「無添藏壽司」合作嘅紙紮迴轉壽司機

同 Bandai 合作嘅紙紮扭蛋機
同 Bandai 合作嘅紙紮扭蛋機

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

遊戲《R4 RIDGE RACER TYPE4》 20週年記念大碟

Bandai Namco 經典 …