Home / 影視 / 《水行俠》無緣奧斯卡最佳視覺效果十強 溫子仁:「電影界之恥!」

《水行俠》無緣奧斯卡最佳視覺效果十強 溫子仁:「電影界之恥!」

唔講你未必知,外界對佢期望最細嘅《水行俠》全球票房原來已經累積超過 8.87 億美元,除咗係啱啱嗰個聖誕檔期最賣座嘅電影之外,亦都係 DCEU 整個系列票房最高嘅電影,導演溫子仁只係首次執導超級英雄電影,已經被外界盛讚係 DC 嘅救星,《水行俠》更加入圍奧斯卡最佳視覺效果嘅 20 強名單!

不過喺兩個禮拜前公布嘅奧斯卡最佳視覺效果最後 10 強名單裡面,《水行者》就無法佔一席位,即使《水行者》有多幕水底世界壯觀嘅場景,評審似乎都係覺得套戲未夠班。而喺呢套戲負責視覺特效嘅 Kelvin Mcllwain 喺溫子仁 facebook 表達期待可以再次合作嘅留言,就引起咗溫子仁表達對奧斯卡評審嘅不滿:「 Kelvin,你同你嘅團隊係呢套戲嘅無名英雄。但事實上你哋嘅視覺特效,評審並無為意或者認同我哋/你哋對呢套劇嘅付出,呢個絕對係電影界嘅恥辱!」

奧斯卡最佳視覺效果最後十強名單包括《 Avengers: 3 》、《黑豹》、《 Ant-man and the Wasp 》、《維尼與我》、《登月第一人‬》、《侏羅紀世界 2 》、《魔法保姆》、《挑戰者 1 號》、《 Solo: A Star Wars Story 》以及《 Welcome to Marwen 》。睇完呢個名單,究竟你會認同評審嘅決定,定係覺得《水行俠》嘅視覺效果好過上面其中一套,可以取而代之呢?

講返《水行俠》本身,雖然讚嘅居多,不過都有人質疑喺漫畫係 Aquaman 頭號宿敵嘅 Black Manta 喺電影點解唔係主要嘅反派,溫子仁就表示雖然 King Orm 係今集嘅主要反派,令到 Black Manta 顯得好似有啲多餘,但其實呢兩大反派係缺一不可。

King Orm
Black Manta

其實電影嘅片尾彩蛋已經特意為 Black Manta 留咗好大嘅伏線,不過當溫子仁被問到係咪會由佢執導續集嘅時候,佢嘅答案居然係未知:「以往同我合作嘅團隊都行一段幾長嘅路,就好似我拍完《兒凶》兩三年後會再拍《兒凶 2 》,但《水行俠》嘅情況有啲奇怪,係我參與電影製作以嚟第一次唔知下一步應該點做。事實上喺我拍完《 Fast & Furious 7 》之後一直都好想再拍動作電影,同時我又想拍一套可以建立一個完整世界觀嘅電影,亦都想拍套超級英雄電影,《水行俠》就一次過滿足哂我幾個願望。當我完成咗呢啲願望之後我就諗我係咪應該返轉頭做返啲小本製作?或者拍返套更有我個人風格嘅電影?亦可以係拍啲大型啲嘅製作,但喺呢一刻我仲未確定到我未來嘅路向。」難得 DCEU 可以做返齣好戲,希望溫子仁最後都係會執導續集呢,唔係我驚 DC 真係會搞唔掂呀……

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

1 部相機 + 14 日 = 一套賀歲片!純香港製作《恭喜八婆》值得入場支持!

雖則話今時今日剩係用部 iPhone 都已經拍到 4K 60fps、1080p 240fps,甚至奧斯卡金像獎最佳導演Steven Soderbergh 挑戰過剩係用 iPhone 拍咗一套擺上大銀幕嘅《 UNSANE 》,不過有 budget 嘅邊個拍戲嘅唔想租返部大機吖,畫質好啲吖嘛。奈何 10 個搞藝術 9 個窮,演員又係錢、場租又係錢、前期後製都係錢,拍膊頭都拍唔到咁多範啦(人哋唔使開飯咩),budget 有限咁點算,彭浩翔導演選擇棄專業攝影機,用一部 Panasonic GH5 去完成整套戲嘅拍攝工作!