Home / 影視 / 動畫 / 【賀歲睇好戲】外語.動畫篇:動作、歌舞、科幻乜都齊!

【賀歲睇好戲】外語.動畫篇:動作、歌舞、科幻乜都齊!

上個禮細佬就同大家講咗有咩賀歲嘅港產同合拍片,今日就同大家講下有咩外語片同動畫啦!

外語片

《轟天暴隊》 1 月 24 日上映

由《與神同行》嘅特技班底製作,加上型到爆嘅河正宇主演,相信引到唔少韓粉入場!故事講述喺 2024 年美國總統大選,河正宇率領國際僱傭兵隊,執行中情局綁架北韓高官嘅任務。當隊員潛行緊南北韓地道時突然被伏擊,隨時引發全球核戰⋯⋯

小編期待度:3 分( 5 分為滿分)

《美式禽獸》 1 月 24 日上映

改編自真人真事名畫劫案,講述 4 個美國青年策劃咗一場極度大膽嘅行盜竊藝術品行動,打算偷走喺學校圖書館裡面價值超過千萬美金嘅古董書籍,但喺過程裡面佢哋開始質疑自己嘅夢想⋯⋯

小編期待度:3.5 分( 5 分為滿分)

《魔法保姆》 1 月 31 日上映

獲得金球獎多項提名,由 Emily Blunt 主演,係 1964 年《歡樂滿人間》嘅續集。故事講述喺 1930 年代,戰後嘅倫敦周圍都係愁雲慘霧, Banks 一家更加有親人離世,大受打擊!喺大家絕望嘅時候,曾經照顧過佢哋嘅魔法保姆 Mary Poppins( Emily Blunt 飾演),再次帶住神奇皮喼同雨遮現身,並聯同佢嘅好朋友 Jack ,用魔法幫佢哋解決問題,為佢哋再次帶嚟希望同歡樂!

小編期待度:3.5 分( 5 分為滿分)

《銃夢:戰鬥天使》 2 月 5 日上映

占士金馬倫執導, Rosa Salazar 、 Christoph Waltz 主演,改編自同名科幻漫畫。故事講述合成人 Alita 畀機械醫師 Ido 救返之後記憶全失。Ido 好努力咁唔畀 Alita 知道自己嘅過去,但 Alita 嘅好朋友 Hugo 就協助 Alita 搵返自己冇咗嘅記憶。同時,各大惡勢力開始搵 Alita ,甚至危及到佢嘅至親,觸發潛藏喺佢體內逆天嘅戰鬥力!為咗搵返自己嘅身世,保護自己愛嘅人,Alita 決定勇敢面對呢班惡勢力⋯⋯

小編期待度:4 分( 5 分為滿分)

動畫

《馴龍記 3 》 1 月 31 日上映

《馴龍記》系列最終章,已經做咗百格島族長嘅思噎仔,同阿翠建立咗一個人類同龍族可以和平共存嘅烏托邦。但好景不常,一隻未被馴服嘅雌性日瘋魔突然出現,同時又出一個前所未見嘅危機,思噎仔同冇牙仔必須離開呢個烏托邦,再次展開冒險,完成佢哋嘅最終使命⋯⋯

小編期待度:4 分( 5 分為滿分)

《 LEGO 英雄傳 2 》 2 月 7 日上映

第一集口碑已經好好,事隔 5 年 終於推出續集!各路英雄再度齊集磚磚堡拯救他們心愛嘅城市,磚磚堡嘅居民過咗 5 年好好嘅生活,突然要面臨 LEGO Dulpo 呢個嚟自外太空嘅入侵者,而且佢嘅破壞力遠超居民嘅重建速度⋯⋯

小編期待度: 4.5 分( 5 分為滿分)

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

《登月第一人》美版 4K UHD 低音澎湃

《登月第一人》呢套戲從太空人的角度去睇整個登月計畫,拍得頗為寫實而且都幾人性化,並不是一味吹奏美國有幾勁,巴頓覺得係近年幾值得睇的太空人電影。