Playit.hk 不玩會死！網誌
細佬前日寫完篇文關於《恭喜八婆》，啲同事就喺度問我過年有咩戲睇，與其續個答，我決定收集呢個新年檔期嘅電影俾大家，等大家睇下今個賀歲檔期有咩戲睇！首先嚟介紹一下港產片同合拍片先！
港產片
《恭喜八婆》1 月 31 日上映
噚日就介紹過，所以唔特別詳細講，睇返《 1 部相機 + 14 日 = 一套賀歲片！純香港製作《恭喜八婆》值得入場支持！》呢篇文啦！
小編期待度：5 分（ 5 分為滿分）
《你咪理，我愛你！》 1 月 31 日上映
王祖藍首次執導賀歲片，碌盡人情卡邀請咗超過 50 位演員參演，包括毛舜筠、曾志偉、王苑之、方力申、阮兆祥、蝦頭、細細粒等。故事改編自百老匯音樂劇《 I Love You, You’re Perfect, Now Change! 》，由 12 個故事串連而成，係少有港產嘅歌舞電影，值得期待！
小編期待度：4.5 分（ 5 分為滿分）
《如珠如寶》 2 月 1 日上映
由林敏驄自編自導自演嘅作品，演員陣容仲包括張繼聰、 Bob 、王菀之、吳耀漢、泰迪羅賓、林雪、莊端兒等。故事講述惡霸洪雨雲（林雪飾）想收購安憩老人院，就搵咗阿俊（張繼聰飾）同阿樂（ Bob 飾）呢對古惑仔兄弟入去搞屎棍，殊不知裡面個個身懷絕技，唯有扮 friend 再搵機會落手。但扮扮下真係 friend 咗，呢個兩兄弟已經當咗呢班老人家係屋企人，當間老人院真係俾畀洪雨雲呃到手，佢哋就決定倒戈相向⋯⋯林敏驄嘅作品黃色笑話就肯定唔少得，加上張繼聰 + Bob 呢個組合，肯定會笑爆咀。
小編期待度：4 分（ 5 分為滿分）
合拍片
《家和萬事驚》 1 月 24 日上映
故事改篇自張達明嘅舞台劇《亞 Dum 一家看海的日子》，講述一個家庭本身間屋望到少少海景，但有一日突然畀一塊新起嘅廣告牌遮咗，跟住就係呢家人同廣告牌主人嘅鬥法，演員陣容包括吳鎮宇、古天樂、袁詠儀、張達明、林雪、吳肇軒、蔡頌思等。雖然故事內容貌似貼地，但實際上本來只係主打中國市場，所以個故事內容有機會係偏中國文化。
小編期待度：2 分（ 5 分為滿分）
《新喜劇之王》 2 月 5 日上映
本來星爺就諗住用《美人魚 2 》打呢個豬年檔期，可惜整唔切後製，所以就秘密拍咗呢套《新喜劇之王》，不過對比《喜劇之王》已經全部變咗中國演員，「新張柏芝」個樣同張柏芝更加係冇得比，唯一賣點可能就係搵返張柏芝配音（但個反差顯得更加難頂）⋯⋯
小編期待度：1 分（ 5 分為滿分）
《廉政風雲 煙幕》 2 月 5 日上映
可能係唯一一套玩認嘅賀歲片，事實上佢本身就唔走賀歲片路線，相信係特登畀一個唔同嘅選擇大家而排上賀歲檔期。演員陣容亦係咁多套裡面最猛，包括劉青雲、張家輝、林嘉欣、方中信、湯怡、陳家樂等。《煙幕》只係《廉政風雲》三部曲嘅第一集，之後仲會有《黑幕》同《內幕》，相信套戲就唔會差，只係香港觀眾會唔會對廉政題材以及 XX 風雲已經有啲厭呢？
小編期待度：4 分（ 5 分為滿分）
《玩轉全家福》 2 月 5 日上映
合拍片就唔一定係中港合拍，呢套就係馬來西亞同香港合作，演員陣容包括盧海鵬、欣宜、林德信、林曉峰、阿牛、林明禎，故事以一家人去旅行為背景，當然呢個旅行將會有重重阻礙，更加會因為語言問題鬧出唔少笑話。
小編期待度：2 分（ 5 分為滿分）
