Home / 音樂星光 / 齊上齊落!日本天團嵐 2020 年最後道別!

齊上齊落!日本天團嵐 2020 年最後道別!

日本天團「嵐( Arashi )」突然宣布將會喺 2020 年中止活動,隊長大野智喺個人聲明提到:「喺 2017 年 6 月,我同四位隊員講過我想喺 2020 年退出,唔再參與嵐嘅活動。」雖然係隊長想退,但另外 4 位隊員相葉雅紀、松本潤、櫻井翔、二宮和也強調呢個係集體決定:「唔係我哋 5 個就唔係嵐!」

大野智喺 2017 年 6 月同其他成員講:「到咗 2019 年嵐就出道 20 年,不如我哋喺 2020 年呢個分界點休團,5 個人分開各自行自己嘅路好唔好?」佢承認呢個係一個好任性嘅決定,但佢真係好想過啲唔受束縛嘅生活:「最初係我提出要退出,甚至想離開 Johnny 事務所,但同大家討論嘅過程我嘅睇法有少少改變,變成暫時休息下,我依然係隸屬 Johnny 事務所,我暫時未諗到之後想做乜嘢,休息之後會慢慢諗。」

因為係隊長大野智想退出,所以所有媒體都將嵐要解散嘅矛頭直指大野智,其他隊員都紛紛跳出嚟解話,表示呢個係佢哋 5 個過去一年共同討論出嚟嘅共識,櫻井翔強調:「唔係我哋 5 個嘅話就唔係嵐,所以唔會出現大野智暫停演藝活動,其餘 4 位繼續以團體身份活動。」曾經講過「只要有一個唔想做,我哋就會決定唔做」嘅二宮和也就表示:「呢件事係我哋一齊落嘅決定,如果大家怪罪大野嘅話,咁係我哋所有人嘅能力都有問題。」而松本潤就強調佢哋並唔係解散。

(左起)相葉雅紀、松本潤、大野智、櫻井翔、二宮和也

嵐喺 1999 年正式出道,直到今日所有佢哋有份嘅電影、電視劇同綜藝節目都有極高收視,官方 fans club 會員高達 230 萬人。早前宣布係喺今年 12 底開始舉行會有 50 場公演嘅成軍 20 周年 5 大巨蛋巡迴演唱會,將會喺日本史上最大規模嘅巡迴演唱,亦相信會係佢哋嘅告別演唱會。

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

2019 week 2 廣東歌私心推介 - Mr.《釋放自己》

Mr. 返嚟喇!細佬其實喺佢哋一出道已經聽佢哋嘅歌,《 Everyone 》、《想太多》、《等不了》,首首都好正,可惜之後接連出現被指抄歌、成員不和、解散、還歌債等負面新聞,令大眾只係聚焦喺佢哋嘅花邊新聞,漠視咗佢哋喺音樂上嘅努力,令到五子都心灰意冷,索性各有各忙冷靜下。