Home / 影視 / 1 部相機 + 14 日 = 一套賀歲片!純香港製作《恭喜八婆》值得入場支持!

1 部相機 + 14 日 = 一套賀歲片!純香港製作《恭喜八婆》值得入場支持!

雖則話今時今日剩係用部 iPhone 都已經拍到 4K 60fps 、 1,080p 240fps ,甚至奧斯卡金像獎最佳導演 Steven Soderbergh 都挑戰過剩係用 iPhone 拍咗一套擺上大銀幕嘅《 UNSANE 》,不過有 budget 嘅邊個拍戲嘅唔想租返部大機吖,畫質好啲吖嘛。奈何 10 個搞藝術 9 個窮,演員又係錢、場租又係錢、前期後製都係錢,拍膊頭都拍唔到咁多範啦(人哋唔使開飯咩), budget 有限咁點算,彭浩翔導演選擇棄專業攝影機,用一部 Panasonic GH5 去完成整套《恭喜八婆》嘅拍攝工作!

友網 PCM 曾經介紹過呢部相機(詳見:《Panasonic GH5s 高靈敏錄影王者》),拍片係唔差㗎,但因乜解究明明真係拍套電影,可以連租機 budget 都冇?無他嘅,純港產片冇乜人肯投資,肯畀錢搞香港電影嘅都冇資源套套都投資,甚至前任演藝人協會主席成龍講過再冇香港電影、中國電影之分,一般人聽落耳其實都幾沮喪。好彩香港仲有班影壇痴線佬,為咗拍啲香港人會有共鳴嘅嘢、拍啲純香港製作,冇人投資就自己嚟,分分鐘本都回唔到⋯⋯

剩係睇演員陣容已經可以吸引到唔同年齡層嘅觀眾入場,除咗四哥謝賢、邵音音、林雪、梁詠琪、楊千嬅之外,用得八婆做題材當然唔少得喺《志明與春嬌》之後就成為咗近年嘅三大御用港女陳逸寧、谷祖琳、林兆霞,唔止有身材仲好有演技嘅 DaDa ,好耐冇拍戲嘅 Isabella ,摘去鮮花然後種出大廈嘅徐天佑等等。都講咗要吸引唔同年齡層,所以戲裡面都搵咗唔少後生仔女, 2015 年出道、已經主演過幾套口碑唔錯嘅郭奕芯、近年由 KOL 跳入樂壇、但為咗可以行一條貼近自己想行嘅路而冇投靠大公司嘅 Yanki 丁可欣,仲有嚟自微辣嘅豪 Dee 、雞 Wing 、綠帽 Paul 等等。

故事以一個已經唔 friend 、由六女兩男組成嘅八婆 group ,因為林兆霞唔小心攞咗上司( Isabella 飾)支人奶去沖咖啡俾個客,為咗要喺收工前搵返支人奶頂包,就搵咗陳逸寧幫手,繼而開始搵返呢個八婆 group 嘅每一個,除咗幫林兆霞搵奶之外,亦都解開每一個人嘅心結。

《恭喜八婆》將於 1 月 31 日上映, 1 月 26 日優先場。

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

Captain Marvel 令 Blockbuster 變朝聖熱點 ?

在電影 Captain Mar …