Home / 熱門電影 / 12 月四大科幻片開戰!移動城市、蜘蛛俠、水行俠、大黃蜂你撐邊套?

12 月四大科幻片開戰!移動城市、蜘蛛俠、水行俠、大黃蜂你撐邊套?

踏入 12 月,唔少大片都趁住聖誕檔期上映。今年足足有 4 套科幻片,仲要避免攬炒分勻一個禮拜一套, 4 套裡面又有邊套吸引到你,定係 Why not ALL 呢?

《移動城市:致命引擎》( 12 月 6 日上映 )

由小說《移動城市 1:致命引擎》改篇,講述喺幾百年後呢個世界已經幾近被摧毀,世界已經變得四分五裂,人類只可以依靠一座座移動「城市」到處搶掠,爭奪最後嘅資源。男主角 Tom Natsworthy 係最強獵食城市倫敦嘅低下階層,而女主角 Hester Shaw 就一心為咗幫媽媽報仇而走入倫敦,但就一齊掉落蠻荒之地⋯⋯呢套相信係四套裡面討論度最低,不過其實呢套肯定唔會差,《魔戒》、《哈比人》導演 Peter Jackson 擔任編劇同監製,導演就係同佢合作無間、《魔戒》視覺藝術總監 Christian Rivers ,剩係呢個陣容都夠睇頭啦!

《蜘蛛俠:跳入蜘蛛宇宙》( 12 月 13 日上映 )

雖然只係一套動畫,但唔好睇少佢,呢套可能係最多蜘蛛俠出現嘅電影,故事講述主角 Miles 係一個住喺 Brooklyn 嘅「平凡」青年,直到明明已經死咗嘅 Peter Parker 突然出現,話教佢點樣先做到真正嘅蜘蛛俠, Miles 先發現自己並唔係唯一、只係呢個宇宙裡面其中一個蜘蛛俠。會喺套戲出現嘅仲包括 Gwen Stacy 、 Spider-Man Noir 、 Peni Parker 同 Spider-Ham ,佢哋最終會一齊對付大壞蛋 Kingpin 。正正因為只係動畫,先可能動員到咁多蜘蛛俠出嚟,喺爛番茄嘅首批影評得到 100% 新鮮度!

《水行俠》( 12 月 20 日上映 )

《水行俠》細佬之前已經詳細介紹過,所以就唔再詳細講,有興趣嘅睇下面兩條 Link 啦!
DC 近年難得一見嘅好戲?《水行俠》終極預告公開!
《水行俠》外媒好評如潮 Jason Momoa chok 爆行紅地毯

《大黃蜂》( 12 月 27 日上映 )

本年度壓軸科幻大作、《變形金剛》系列前傳,故事返去 1987 年,主角 Charlie 係一個非常大膽嘅少女,二手車店老板送咗一部殘舊嘅黃色甲蟲車俾佢做生日禮物,當佢想修理架車嘅時候先發現⋯⋯嗱,套戲有兩大亮點: 1. 唔係由 Michael Bay 執導、2. John Cena 第一套荷里活電影,係咪已經有充份理由入場呢?

四套科幻大作你又會撐邊套呢,不妨留言一齊傾下!

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

第 76 屆金球獎入圍名單公布 《黑豹》成首部入圍戲劇類的超級英雄電影

第 76 屆金球獎( 76th Golden Globe Awards )將會喺下年 1 月 6 日舉行,噚日就公布咗入圍名單,《黑豹》嘅入圍同《星夢情深》總共有 5 項提名,可以話係亮點之一。