Home / 音樂星光 / 2019 week 1 廣東歌私心推介 - 方皓玟《時間囊》

2019 week 1 廣東歌私心推介 - 方皓玟《時間囊》

其實兩個月前已經想做呢個系列,不過一直唔知點入手,索性就等 2019 年先開始做,所以由今日開始,每個禮拜一細佬都會推介一首推出未夠兩個月嘅新廣東歌,推介呢首歌嘅原因可能係鍾意個旋律、鍾意份詞、又或者勾起到一個故事。

2019 年 week 1 我會推薦方皓玟嘅《時間囊》。自 2010 嘅《異流》之後方皓玟所有嘅個人作品都係由佢自己包辦作曲作詞,不過今次就搵嚟林若寧填詞,小明喺一個電台訪問就解釋因為近呢 10 年都係自己填自己嘅作品,今次想有一個 refresh 嘅感覺,所以就搵咗一個自己欣賞嘅填詞人幫忙。《時間囊》係對應返古巨其嘅《太空艙》,《太空艙》係由林夕填詞,要寫返份對應嘅詞,最好梗係搵返佢徒弟出馬啦!

《時間囊》嘅宗旨好簡單,就係叫大家珍惜身邊嘅人,還掂做咩都係「沒法阻 時間走 時間走 總要走」,與其不斷諗方法「停留時間」,不如直接啲「停留所愛」啦!呢首歌真係好啱年頭呢啲時間聽,因為大家都好鍾意趁呢啲時間回顧返自己上一年做咗啲乜、有咩目標未達成,咁不如喺你展望新一年嘅同時,諗下有邊啲朋友已經好耐冇見,約佢出嚟食個飯見個面啦!

P.S. 唔好再休息喇,今年出多幾首歌啦!

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

張敬軒打破塵封 16 年紀錄 成首位歌手同一年獲得四首四台冠軍歌

2018 年嘅香港樂壇可以話係張敬軒玩哂,今年派歌唔算特別多,不過就年頭派到年尾,仲要勝在首首都中,唔計剩係派咗上 TVB 嗰首廣告歌《 Make A Beat 》,派咗四首歌,四首都成為四台冠軍歌,破咗已經塵封 16 年、由陳奕迅保持嘅紀錄!