Home / 音樂星光 / 2019 week 2 廣東歌私心推介 - Mr.《釋放自己》

2019 week 2 廣東歌私心推介 - Mr.《釋放自己》

Mr. 返嚟喇!細佬其實喺佢哋一出道已經聽佢哋嘅歌,《 Everyone 》、《想太多》、《等不了》,首首都好正,可惜之後接連出現被指抄歌、成員不和、解散、還歌債等負面新聞,令大眾只係聚焦喺佢哋嘅花邊新聞,漠視咗佢哋喺音樂上嘅努力,令到五子都心灰意冷,索性各有各忙冷靜下。

其實五位喺大家以為佢哋解散咗嘅期間並冇離開過音樂,結他手 Ronny 、 MJ 一直都有開班教結他、鼓手 Tom 全力搞自己間樂器舖、 Bass 手 Dash 就主力參與幕後嘅工作,而主音 Alan 就單飛出咗幾首歌。喺上年 4 月五位就曾經合體出 show ,強調 Mr. 並冇解散,只係約滿舊公司轉做獨立樂隊!

去到今年終於再派新歌《釋放自己》,歌如其名、甚有一種釋放過去幾年抑壓咗好耐嘅負面情緒,佢哋之前接受其他平台訪問提到,喺拍 MV 嘅時候都特登放到盡,加上呢首歌嘅後期混音用足幾個月嚟製作,希望俾大家見到佢哋係好認真、團火仲勁過以前!

見到佢哋五個都已經老咗真係有份莫名嘅心酸,明明可以變得更成熟、做更多好作品嘅時候,偏偏俾負面新聞打沉咗,或者呢個社會真係太多禁忌,有時真係需要逆向選擇離地,先可以釋放自己、繼續追夢。老老豆豆,五位上年就講過 2019 年會有大嘢搞,唔會剩係出一首歌咁少掛(傳緊會開 show ),等緊你哋出多啲新歌呀!

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

KKBOX 香港 10 週年 首個屬於香港人嘅「風雲榜」3 月登場!

香港樂壇嘅頒獎禮其實唔少,雖然話去到今時今日公眾投票會係其中一個首歌有冇獎攞嘅因素,但播放率依然係會受到主持人嘅喜好影響,好似同真係自己揀仲有少少距離,不過嚟緊就會有一個真係香港人自己「揀」嘅樂壇頒獎禮 ー 「 KKBOX 香港風雲榜」。