Home / 音樂星光 / 2019 week 4 廣東歌私心推介 - Pandora 潘朵拉樂團《如若我》

2019 week 4 廣東歌私心推介 - Pandora 潘朵拉樂團《如若我》

當一個社會大部分人都好似冇乜希望、望唔到前路,好似點努力都會俾人否定嘅時候,呢個社會就會彌漫住一種好鍾意回顧嘅感覺,而伴隨住回顧嘅一定會有後悔,今日細佬推介嘅《如若我》就係以呢個為主題嘅情歌。

其實講後悔、分手之後仲好掛住對方嘅情歌真係有好多,細佬即刻已經諗到上年符家浚已經有首《回頭開始》,所以如果單單用呢個情緒作為主題,首歌就會變得平平無奇。細佬成日都話 MV 對一首歌嚟講真係好重要,《如若我》就咁聽嘅話可能只係 get 到首歌係講「偶遇前度,發現自己仲好掛住對方,如果可以時光倒流,有冇可能改寫到分手呢個結局」,但 MV 用「菲林曝咗光就會咩都冇哂(編按:那個情況應該叫走光吧?)」嚟包裝,除咗突顯呢個結局係點都冇辦法改寫之外,亦都暗示有啲回憶破壞咗就係破壞咗,點都冇可能修補,就好似菲林走咗光就冇可能晒得返張相。

《如若我》係 Pandora 潘朵拉樂團喺 2017 年重組之後第 5 首 plug 嘅歌,另外 4 首分別係《捉緊心跳》、《你班友》、《鄰家的你》同《瘋人院》, 5 首歌嘅風格都截然不同,有輕鬆、有嚴肅、有講夢想、有情歌,每首都好正,證明佢哋真係可以 handle 到唔同類型嘅歌。上年年尾佢哋講過今年其中一個計劃係會開 show,期待佢哋快啲出多幾首唔同主題嘅新歌,開 show 嗰陣玩多啲唔同類型嘅歌!

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

2019 week 2 廣東歌私心推介 - Mr.《釋放自己》

Mr. 返嚟喇!細佬其實喺佢哋一出道已經聽佢哋嘅歌,《 Everyone 》、《想太多》、《等不了》,首首都好正,可惜之後接連出現被指抄歌、成員不和、解散、還歌債等負面新聞,令大眾只係聚焦喺佢哋嘅花邊新聞,漠視咗佢哋喺音樂上嘅努力,令到五子都心灰意冷,索性各有各忙冷靜下。