Home / 音樂星光 / 2019 week 3 廣東歌私心推介 - Hinry 劉卓軒《遇怪魔我急於變大個》

2019 week 3 廣東歌私心推介 - Hinry 劉卓軒《遇怪魔我急於變大個》

之前講過呢個系列會盡量都係講兩個月內出嘅歌,但呢排咁興玩 #10yearschallenge ,本質上大家玩嘅心態都係想懷緬一下過去,加上呢首歌最近出咗個新 MV ,所以就決定推薦呢首歌——《遇怪魔我急於變大個》。

「遇怪魔我急於變大個」呢句說話其實係改編自《數碼暴龍 01 》廣東話主題曲嘅其中一句「遇怪魔我即刻變大個」,《數碼暴龍 01 》除咗係唔少 90 後嘅童年回憶,呢首主題曲亦都係唔少人唱到今時今日都仲識唱嘅歌。細個嗰陣啲長輩成日都會同你講呢樣大個先做得、嗰樣大個先做得,唔畀我哋掂都係為我哋好、為保護我哋,好似大人有好多特權咁,所以唔少小朋友成日都想快啲大,成日都覺得自己遇「怪魔」就可以即刻大個。

喺好想快啲大之後就係大個咗唔想咁快大,甚至想返轉頭,除咗係唔想老之外,更加係因為細個可以無憂無慮咁做好多嘢,有咩事一定會有人支撐你、保護你,但大個咗好多嘢都要靠自己,而且好多嘢都唔會如你所願。細個成日都會覺得讀書考試好辛苦,點解啲時間會過得咁慢,但大個會發現時間原來過得好快,讀書考試只係「 a piece of cake 」,返工仲辛苦呀;細個會覺得只要努力就會有偉大成果,但大個會發現自己可能只係一個無名氏,努力過後換嚟嘅可能只係痛楚。

不過成長係冇人可以違背佢、逃離佢,青春係會無影無蹤咁離開我哋,有啲人會慢慢變得麻目,任由自己嘅願望之火被撲熄,甚至連自己嘅初衷都拋諸腦後,令自己已經唔似自己,但咁係咪你想要嘅結果呢?

三個月前, Hinry 喺自己第一個演唱會唱呢首歌嘅時候,講過一個「三次進化」論:「有人話:人會有三次進化長大嘅時刻。第一次係發現自己唔係世界嘅中心嘅時候;第二次係發現即使再點努力,終究有啲事仍然係無能為力;第三次係明知道有啲事可能會無能為力,但仍然會盡力爭取。」

好多時大家都覺得大個咗係咁㗎啦,有啲嘢係要接受、係要妥協㗎啦,但其實唔一定係咁㗎(至少我係咁認為),唔係每樣嘢都要逆來順受㗎,覺得唔啱唔一定要第一時間就強迫自己接受,可以爭取咗先、可以提出你覺得啱嘅嘢先,係未必得㗎,但至少你試過、至少你唔會老咗先嚟後悔!

年輪枷鎖 沒辦法閃躲 我已經不似我

「其實你一直都係被選中嘅細路,只係你自己一直無察覺到。」

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

2019 week 2 廣東歌私心推介 - Mr.《釋放自己》

Mr. 返嚟喇!細佬其實喺佢哋一出道已經聽佢哋嘅歌,《 Everyone 》、《想太多》、《等不了》,首首都好正,可惜之後接連出現被指抄歌、成員不和、解散、還歌債等負面新聞,令大眾只係聚焦喺佢哋嘅花邊新聞,漠視咗佢哋喺音樂上嘅努力,令到五子都心灰意冷,索性各有各忙冷靜下。