Home / 影視 / 符合大眾口味又不失風格 DC 近年最佳電影《水行俠》觀後感

符合大眾口味又不失風格 DC 近年最佳電影《水行俠》觀後感

話說細佬今個月有 5 套戲想睇,不一直都好忙抽唔到時間,今日趁住公司俾我 home office 即刻借啲易蛇出去睇《水行俠》!本身對呢套戲期望唔大,始終 DCEU 前面幾套都係出碟嘅導演剪輯版好睇過喺戲院上嘅版本,不過見到啲評價咁好, Amber Heard 又咁靚女,咪決定入場睇。果然我嘅眼光係唔錯,真心想入多次場睇多次!

【以下內容盡力無雷,如有請見諒】

《水行俠》係 DCEU 第六套電影,我夠膽講呢套係六套裡面拍得最好嘅一套,以往唔係人物刻劃過份冗長,就係太貪心想一套戲講哂所有人,最後變咗好似乜都冇講咁,今次就冇出現呢啲問題。其實今次對 Aquaman (  Jason Momoa 飾)嘅描寫係夠,不過細佬覺得套戲可以貪心返少少,因為成套戲對比近年嘅超級英雄電影係偏慢,如果可以加快返個節奏,講多少少 Aquaman 同母異父嘅細佬 Orm( Patrick Wilson 飾)冇咗媽媽之後想法變得極端嘅過程,咁就完美。

Orm( Patrick Wilson 飾)

選角方面,其實早喺《 Batman vs Superman 》 Aquaman 已經出過場,當時其實有唔少人質疑搵 Jason Momoa 飾演係咪合適,因為同漫畫嘅金毛仔形象相差得都幾遠,不過喺《 Justice League 》嘅演出已經足夠回應大家嘅質疑,今次更加突顯咗 Aquaman 大細路、有認真又有搞笑嘅一面。(我好肯定劇組有參考《 Thor 3 》ww )

Aquaman( Jason Momoa 飾)

至於飾演 Mera 嘅 Amber Heard 可以話冇人比佢更適合,因為 Amber Heard 真人本身就係一位忠於自己、好有主見嘅性格女星,同 Mera 嘅人物設定非常相似。 Amber Heard 早喺 2010 年、大眾平權意識依然薄弱嘅時期已經唔怕被標籤,走出嚟承認自己係雙性戀,多年嚟一直為 LGBTQ (女同性戀、男同性戀、雙性戀、跨性別、對其性別認同感到疑惑嘅人)發聲,同故事裡面 Mera 唔怕被冠以叛國之名都要搵 Aquaman 拯救陸地非常接近, Amber Heard 嘅演繹亦都突顯到 Mera 並唔單單係一個花瓶,而係真真正正嘅女主角。

Mera( Amber Heard 飾)

最後點都要講下被稱為現代恐怖大師嘅導演溫子仁,正如我之前講過,經歷過 Christopher Nolan 嘅 Batman 三部曲大成功之後, DC 出品嘅電影都會被認為係要走暗黑風格,問題係 Nolan 成功嘅地方係冇當 Batman 係超級英雄電影咁拍,但如果想參考 Marvel 建立一個咁龐大嘅世界觀,呢套係唔 work ,就算近年受歡迎嘅另類風格超級英雄電影《 Logan 》、《 Deadpool 》都明顯地只係適用喺自己嘅世界觀,好難同一個龐大嘅電影宇宙連接。但溫子仁的確好似外媒所講咁拯救咗 DC ,因為佢似乎幫 DC 搵到一條大眾會接受、但同 Marvel 會有唔同嘅一條路。首先,英雄本身都係人,拯救世界並唔需要有一個好宏大嘅理想,亦唔需要做到好似完美咁毫無缺憾,《水行俠》整套亦都好強調呢點,就算 Aquaman 做咗海嘅真王,佢依舊會有佢人性化嘅一面。另外,有暗黑面還暗黑面,畫面嘅處理並唔需要全程都死氣沉沉,有輕鬆搞笑位更加係近年必備嘅元素,《水行俠》喺呢點上可以話係暫時 DCEU 拿捏得最好嘅一套,加上溫子仁運用返佢喺拍恐怖片用度嘅技巧,令《水行俠》有返適當嘅緊張感,唔會下下都出現「我估到你下一步做咩啦」嘅情況。

溫子仁

DCEU 已經拍好排咗期上畫嘅包括有 2019 年嘅《 Shazam 》、《 Joker 》同 2020 年嘅《 Wonder Woman 1984 》,有傳電影公司已經為 DCEU 做咗 soft reboot ,始終飾演 Superman 同 Batman 嘅 Henry Cavill 同 Ben Affleck 都已經跳船,橫掂之前幾套評價都唔係咁突出,亦冇可能短時間內追趕到 Marvel ,與其盲目跟風, soft reboot 慢慢拍返一啲可以跳出以往嘅框架、又不失 DC 味道嘅電影都不失為一個好嘅選擇。

《 Shazam 》
《 Joker 》
《 Wonder Woman 1984 》

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

Captain Marvel 令 Blockbuster 變朝聖熱點 ?

在電影 Captain Mar …