Home / 最新文章 / IU 十周年演唱會香港站:「 This is the BEST concert I ever had!」
Photo Credit: Wesley Tang

IU 十周年演唱會香港站:「 This is the BEST concert I ever had!」

IU 出道十周年演唱會香港喺啱啱過去嘅禮拜六(12/8)完滿結束,香港嘅 fans 仲成功令一向好少會喺台上面喊嘅 IU 喊咗出嚟(下面會講多少少)!演唱會全晚以「電影」做包裝,同大家回顧返 IU 過去十年嘅歌唱生涯。

Photo Credit: Wesley Tang

全晚首首好歌就梗㗎喇,不過請嚟嘅兩個嘉賓都好有驚喜,首先就有 IU 最近有為佢作詞、《鬼怪》OST《 Who are you ?》嘅主唱 Sam Kim ,之後仲有陳柏宇,最驚喜嘅係陳柏宇有特登練好韓文同 IU 合唱《 Nagging 》,啲發音準到連 IU 都嚇親,佢仲用英文同 IU 講:「今次我同你合唱咗韓文歌,下次再合唱要唱廣東話歌!」( IU 十周年演唱會台北站喺 24 同 25 號搞,不如你邀請佢做你 26 號尾場嘅嘉賓啦 ww )

IU 香港 Fans Club IUHK 今次準備咗兩張應援手幅俾全場 fans,可以話係帶咗好大嘅驚喜俾 IU !首先係紫羅蘭手幅, IU 曾經講過「雖然我本身已經好鍾意紫羅蘭,但更大嘅原因係同 fans 有關:『雖然望落脆弱,但卻默默咁散發光芒』。」,全場 fans 就喺佢唱緊出道歌《 Mia( Lost Child )》嘅時候舉起紫羅蘭手幅, IU 當刻已經大讚諗到呢個 event 嗰個人係天才,話呢個可能係佢人生中最好嘅演唱會!

不過更誇張嘅係 IUHK 準備咗另一張手幅叫大家寫自己名上去,喺 IU 唱《 Dear Name 》嘅時候舉起。其實《 Dear Name 》呢首歌別有意義,雖然佢只係講過希望呢首歌可以帶俾人有安慰嘅感覺,但明眼人一睇就知係寫畀世越號嘅遇難者,同時想同大家講「我的心中有你」。

《 Dear Name 》今次係喺 encore 嘅時候唱,雖然 IU 出名會有 en-encore ,但 encore 完咗之後播咗條 ending 片,相信本來真係無諗過會 en-encore ,但 IU 再次走出嚟:「本來今晚係冇準備會有 en-encore ,因為我哋有啲工作人員今晚就要搭夜機走,不過頭先嗰 event 實在太正,一開始我其實睇唔明,不過當我見到有韓文、英文同中文,我就 get 到呢啲係大家嘅名,我即刻忍唔住喊,我真係好少喺台上喊,不過呢個係我人生中收過最正嘅 event,所以我一定要再行出嚟!」 IU 本來仲想邀請策劃呢個應援嘅負責人上台傾下偈,不過因為要維持現場安全嘅原因所以保安唔準, IU 索性走落台握住負責人 Momo 隻手同佢講多謝,仲錫咗佢嘅手背一下!其實搞應援真係好難,特別喺香港,大家好似特別怕醜咁,一陣 fail 咗又會畀人狂插,唔係好有愛都唔會走去諗呢啲嘢,所以呢個回報係 Momo 應得!

網上圖片

其實 IU 都幾重視香港嘅 fans,自 2014 年第一次嚟香港搞 showcase 之後,每一年都會嚟香港一次,每次都會唱一首廣東歌,每一年都同大家約定下年再嚟,希望下年會再喺香港見到 IU 啦!最尾梗係私心擺細佬最鍾意嗰首歌啦 ww(話說佢已經講到明下年開始會減少唱可愛曲風嘅歌,今次分分鐘係最後一次睇到呢首歌嘅 live /.\ )

Comments

comments

About JY

一個唔識打機但又鍾意獻醜,上至天文下至地理乜都識啲,但又乜都唔熟嘅廢青ww,最緊要玩得開心、大睇得開心!

Check Also

2019 week 1 廣東歌私心推介 - 方皓玟《時間囊》

2019 年 week 1 我會推薦方皓玟嘅《時間囊》。自 2010 嘅《異流》之後方皓玟所有嘅個人作品都係由佢自己包辦作曲作詞,不過今次就搵嚟林若寧填詞,小明喺一個電台訪問就解釋因為近呢 10 年都係自己填自己嘅作品,今次想有一個 refresh 嘅感覺,所以就搵咗一個自己欣賞嘅填詞人幫忙。